बने दिन

राजा ह, उछाह म गरजिस,
'बने दिन  अवइय्या हे'
मंत्री मन मुचमुचइस,
'बने दिन  अवइय्या हे'
अधिकारी मन गदकिन,
'बने दिन  अवइय्या हे'
करमचारी मन छटपटइन,
'बने दिन  अवइय्या हे'

जनता ह जोशियाईस,
'बने दिन  अवइय्या हे'
शहेर-नंगर ह चिचियाइस,
'बने दिन  अवइय्या हे'
गोठ ह गाँव के मंगलू कर पँहुचिस,
'बने दिन  अवइय्या हे'
मंगलू ,बुजरुग चैतू ल सोरियाईस,
'बने दिन  अवइय्या हे'
सियान ह सुनिस, गुनिस अऊ बरजिस,
'सबे दिन बने हे ग',
"बने दिन आये नही,लाने जथे"
परछी म ओरमे,धंधाय पिंजरा ले
मिठ्ठू ह ,किररईस
'बने दिन  अवइय्या हे'

 टीका देशमुख
तेंदुभाठा (बकरकट्टा)
जिला- राजनांदगाँव