आज के रचना

उहो,अब की पास कर गया ( कहानी ), तमस और साम्‍प्रदायिकता ( आलेख ),समाज सुधारक गुरु संत घासीदास ( आलेख)

शनिवार, 23 अक्तूबर 2021

पानी

हमन तोर रागी अन, मालिक!
हमर हांत म का हे?
हमन त पानी अन, मालिक!

तंय सावन कहिथस
बरस जाथन,
भोमरा कहिथस
अऊँट जाथन,
नदिया कहिथस
त दऊँड़े लगथन,
तंय बांधा कहिथस
कलेचुप रुक जाथन

सब तोरेच हांत म हे,
हमन त पानी अन, मालिक!

तंय समुंदर कहिथस
खारो हो जाथन,
कुंवा कहिथस
त मीठ हो जाथन,
तंय नल कहिथस
खुल जाथन,
बोतल कहिथस
धंधा जाथन

सरी दुनिया तोर मुठा म हे,
हमन त पानी अन, मालिक!


तंय माटी कहिथस
भंगेल देथन,
पखरा कहिथस
टोर देथन,
तलवार कहिथस
त छाती म झोंक लेथन
तंय बारूद कहिथस
हिरदे म समो लेथन

अपन मुठा ल तंय बांधे राहा,
हमन त पानी अन, मालिक!

                - यशपाल जंघेल
                  सहायक शिक्षक
                   बैगा साल्हेवारा
              जिला - राजनांदगांव(छ. ग.)
             मो. 9009910363

कोई टिप्पणी नहीं:

एक टिप्पणी भेजें